اقسام الموقع

إشاعه الكاش هو اهم حاجة في البروسيسور


 

dolar

 

الكاش هو اهممم حاجة في البروسيسور !
ايا كانت المواصفات التانية
يعني بروسيسور كور تو ديو كاش 6 ,,,, أقوى من بروسيسور كور تو كواد كاش 4 …الخ

الحالة:-خاطئة Busted

التوضيح:- 

ال”Cash” اللي موجود في الصورة هو فعلا هو المهم :D
اما ال”Cache” اللي في البروسيسور فهو مهم برضو ,,, لكن ميوصلش لدرجة ان يتم تفضيل بروسيسور على اخر بمجرد معرفة الكاش وخلاص

ده نفس الحوار بتاع قياس كرت الشاشة بالرام المؤقتة بتاعته واهمال باقي المواصفات
نفسي اعرف الصراحة ايه السر في ان كل حاجة يتركز فيها على ذاكرتها المؤقتة ؟!

باختصار جدا الكاش ده عبارة عن ذاكرة مؤقتة داخل البروسيسور (غير الRAM) بيخزن فيها المعلومات المهمة بحيث يوصلها اسرع من انه قعد يطلبها كل شوية من الرام لان اكيد طبعا وصوله للذاكرة اللي جواه حيكون اسرع من وصوله للRAM
زيادتها او سرعة الوصول ليها مهم فعلا
بس مش معقول تكون هي عامل التفرقة الوحيد

فيه عوامل تانية مهمة ايضا وهي :

1- الCores او الأنوية … مش معقول تفضل تقول على معالج ثنائي انه اقوى من رباعي عشان الكاش بتاعه اعلى
في حين ان ميزة انه عنده نواتين زيادة ديه تعمل فرق اكتر بكتير من الفرق اللي يعمله الكاش
والكورز في الوقت الحاضر تعتبر من المميزات المهمة جدا اللي تفرق بين بروسيسور والتاني

2- التردد/السرعة :
برضو ديه من الحجات المهمة ,,, هو الحمد لله في كتير من الناس بتذكرها لما تيجي تقول المواصفات مع ذكر الكاش
لكن برضو انت كدة مقلتش كل المهم : يعني تلاقيه بيقولك بروصيصور 2.3 كاش 4
هو صحيح انت كدة اقل سوء من اللي بيركز على الكاش بس ,,, لكن تظل برضو مجبتش المفيد

لان احيانا بروسيسور تردده اقل من بروسيسور تاني لكن في نفس الوقت بيكون البروسيسور صاحب التردد الاقل اسرع (بسبب الأنوية على سبيل المثال)

3- المعمارية والجيل :
فمثلا بتلاقي فيه كذا جيل من بروسيسورات ال i3 والi5 والi7
طب ايه الفرق بينهم ؟
كلهم نفس الاسم اه
لكن بيتم عملهم بعمارية جديدة (زي سادني بريدج السابقة ,وإيفي بريدج الحالية) وكمان بدقة تصنيع اقل
والعوامل ديه برضو بتفرق
فلو جبت بروسيسور i5 من الجيل الاولاني مع واحد i5 اللي معمول على معمارية ساندي بريدج , حتلاقي فيه فرق واضح بينهم

3-الThreads : الميزة ديه قد تكون ملهاش اهمية كبيرة اوي
لكن انا حبيت اذكرها لانها فعلا مش مهمة عن اصحاب الاستخدامات العادية للجهاز ,,, اما اللي بيشتغلوا في المونتاج والتصميمات الثري ديي والحجات ديه ..فخاصية الHyper Threading تعتبر خاصية مهمة ليهم
وحتسرع عملية الريندر بشكل كبير (حسب طبعا قدرة البرنامج على التعامل معها)

4- بعض الخصائص الاخرى الفرعية : مثلا زي الVT-x اللي بتحسن الاداء في برامج الانظمة الوهمية
وكمان كونه مفتوح بحيث تقعد تكسر سرعته براحتك ..الخ
طبعا ديه متوصلش انها تكون اهم من الكاش بس اهي برضو تعتبر عمليات في التفريق بين البروسيسورات للي ليهم استخدامات خاصة بيحتاجوا فيها المميزات ديه

باختصار :-

حاول تبتعد عن الجملة الشهيرة :
لامؤخذة ده بروصيصور 3.2 كاش 600 ..الخ
الأصح هو انك تبتدي بذكر اسمه وموديل البروسيسور فتقول :
بروسيسور كور تو ديو E7500
او بروسيسور i5 2500k
فاذا كان المتلقي فاهم في الكمبيوتر وانواع البروسيسورات غالبا حيكون عارف مواصفات البروسيسور ايه
او حيرجع للنت عشان يعرفها
وممكن انت بعد كدة تسردله المواصفات الباقي اللي ذكرتها فوق : الانوية, السرعة , الكاش ..الخ

مستنين:-

آراكم واقتراحتكم لاي اشاعات تانية نتكلم عنها
ولو فيه حد عنده اشاعة وعايز يكتب عنها
ممكن يعمل كدة ويكتبها بنفس الاستايل ده وحننشرها بإسمه في الصفحة ان شاء الله

ملاحظات :-

1- الكلام قد لايكون علمي 100% وانا تعمدت كدة عشان احاول اوصل المعلومة لاكبر قدر ممكن من الناس
وخصوصا ان اللي عنده معلومات في الكمبيوتر يفترض يكون عنده علم بالموضوع ده
وفي النهاية اللي عايز يستزيد ويفهم الموضوع بشكل علمي وتقني اكتر ممكن يدور في جوجل
2- الصورة بتاعت الدولرات ديه جايبها على سبيل السخرية كناية عن مصطلح الCash …وطبعا ديه مختلفة عن الCache اللي في البروسيسور (لكن النطق واحد ^_^)

منقول من Mohmed Shalby

الوسوم