نصائح عشان موبيلك مايفصلش منك فى نص اليوم

Best-Battery

للاسف عُمر البطارية بيعتبر من أكبر المشاكل الى بتواجه مستخدمى الـ smartphones، عشان دلوقتى البطارية اللى بتكمل اليوم كله بقت بتعتبر كويسة. عشان كده، عُمر بطارية التليفون بقى أحد المعايير اللى الناس بتختار على أساسها التليفون اللى هتشتريه. السبب فى قصر عُمر البطارية بيرجع إلى أن التطور في تطبيقات وإمكانيات الـ smartphones )واللى بتستهلك طاقة كبيرة) بيبقى غير متماشي في أغلب الأحيان مع التطور فى قدرة البطاريات.

في شوية نصائح بسيطة لو تم اتباعها هتطول فى عمر البطارية.

التحكم فى إضاءة الشاشة

إضاءة الشاشة من أكثر الحاجات اللى بتستهلك البطارية، كل ما درجة الإضاءة بتاعة الخلفية بتكون أعلى، كل ما استهلاك البطارية بيكون أكثر. فلو ضبط درجة الإضاءة على مستوى منخفض هتقلل من استهلاك البطارية وتزود احتمالات إن التليفون يكمل معاك لآخر اليوم.

معظم الـ smartphones الجديدة فيها خاصية ضبط الإضاءة أوتوماتيكيًا وده كويس لو إنت فى حتة الإضاءة فيها مش كويسة، إنما لو واقف فى الشمس، التليفون هيزود إضاءة الشاشة إلى أقصى درجة ممكنة وده هيستهلك طاقة كثير وبرضه مش هتشوف كويس في الغالب، وبالتالي أحسن حاجه إنك تضبط إضاءة الشاشة على درجة منخفضة نسبيًا.

فى حاجه كمان ممكن تساهم فى الحد من إستهلاك البطارية، وهى وضع التليفون فى وضع الاستعداد (standby) فى حالة عدم الاستخدام أو ضبط التليفون على إنه يدخل وضع الاستعداد أوتوماتيكيًا بعد دقيقة واحدة من عدم الاستخدام.

الحد من استخدام الـ Bluetooth والـ Wi-Fi

من المؤكد طبعاً إن الـ Bluetooth والـ Wi-Fi بيستهلكوا كثير من البطارية، لكن فى نفس الوقت، بيبقى صعب الاستغناء عنهم تماماً. الفكرة إنك ممكن تبقى فاتح الـ Wi-Fi حتى لو مش بتستخدم التليفون أصلاً وهو بيتصل أوتوماتيكيًا بأى شبكة متاحة ويستهلك طاقة البطارية. أفضل حل هو إنك متشغلش الـ Wi-Fi إلا إذا كنت فعلاً محتاجه. نفس الكلام بينطبق على الـ Bluetooth، لأن فعلاً مفيش أى هدف من إنك تفضل مشغله على الفاضى.

نظام التموضع العالمي (GPS)

محدش يقدر ينكر مدى أهمية الـ GPS ومدى الاستفادة منه، و فى ناس بتحب تخلى تطبيقات زى Twitter وFacebook تحدد المكان اللى هما فيه، لكن للأسف االمبالغة في استخدام الموضوع ده بتسحب طاقة كثير من البطارية ويُستحب التقليل منه. وكمان فى تطبيقات على الـ iPhone بتطلب الإذن إنها تحدد مكانك ولو وافقت بتخليها تفتح الـ GPS عشان تعمل كده و بتشكل عبء إضافي على البطارية. يستحسن إنك ما تشغلش الـGPS  إلا لو إنت فى العربية و محتاج إرشادات للطريق.

التخلص من خاصية الاهتزاز والإخطارات (Notifications)

معظم الناس فاكره إن الرنات بتستهلك كثير من البطارية، فبتحاول ترشد استهلاك الطاقة عن طريق إنها تشغل خاصية الاهتزاز، لكن العكس هو الصحيح. وبالتالي، يستحسن إنك متشغلش خاصية الاهتزاز لو تقدر تستغنى عنها. على صعيد آخر، فى تطبيقات زى Facebook وTwitter بتبعت إخطارات: لو لقيت نفسك مش بتقراها وبتمسحها على طول يبقى يستحسن إنك تلغيها عشان بتستهلك طاقة كثير من البطارية.

لو مفيش إرسال، إقفل الـ 3G

لو لقيت نفسك فى حته مفيهاش إرسال، إقفل الـ 3G لأن طول ما مفيش إرسال، التليفون بيدور على شبكة لحد ما تروح حته فيها إرسال، وخلال وقت البحث، بيستهلك طاقة من البطارية على الفاضى.

التعليقات

  1. شكراً لك على المقال
    لكن أتمنى لو تكتب باللغة العربيه الفصحى
    لأن المتابعين ليسوا من دوله واحده فقط .
    تختلف اللهجات لكن اللغة العربيه تجمعنا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *